पुढील दोन दिवस पावसाची शक्यता

अरबी समुद्राच्या दक्षिण भागात तयार झालेल्या कमी दाबाच्या पट्ट्याने कोकण, गोवा ते मध्य महाराष्ट्रापर्यंतचा भाग व्यापला आहे. त्यामुळे पुढील दोन दिवस पुण्यासह मध्य महाराष्ट्र, कोकण आणि गोव्यात पावसाची शक्यता वर्तविण्यात आली आहे. पुण्यात दिवसभर आकाश ढगाळ राहणार असून, हलक्या स्वरूपाचा पाऊस पडणार आहे. मध्य महाराष्ट्र आणि कोकणाच्या काही भागांत मेघगर्जनेसह विजांचा कडकडाट होणार असल्याचा अंदाज भारतीय हवामानशास्त्र विभागाने (आयएमडी) व्यक्त केला आहे.

कडाक्याच्या थंडीचा जोर ओसरून पुणेकर सध्या दिवसभर ढगाळ वातावरण आणि उकाड्याचा अनुभव घेत आहेत. गेल्या दोन दिवसांत किमान तापमानात लक्षणीय वाढ झाली असून, कमाल तापमानात थोडी घट झाली आहे. पुण्यात दिवसभरात किमान १७.९ अंश सेल्सिअस आणि कमाल ३१.१ अंश सेल्सिअस तापमानाची नोंद झाली. दिवसभर ढगाळ हवा होती. दुपारी पाऊस पडेल, असे वातावरण असूनही पाऊस पडला नाही.

राज्यात किमान तापमानात लक्षणीय वाढ झाली. राज्यातील नीचांकी तापमान १५.७ अंश सेल्सिअस महाबळेश्वरमध्ये नोंदविण्यात आले. हवामानातील प्रतिकूल घडामोडींमुळे पुढील चार दिवस पावसाचे राहणार असल्याचे ‘आयएमडी’ने सांगितले आहे.

स्त्रोत- महाराष्ट्र टाईम्स

LEAVE A REPLY

Please enter your comment!
Please enter your name here