कोयना धरणाचे दरवाजे १३ दिवसांनी बंद

मुसळधार पावसामुळे कोयना धरण पाणलोट क्षेत्रातून मोठ्या प्रमाणावर पाण्याची आवक होऊ लागल्याने ३ ऑगस्‍ट रोजी कोयना धरणाचे सहा वक्र दरवाजे उघडण्यात आले. त्यानंतर सुमारे १३ दिवसांनी आज (ता.१६) दुपारी कोयना धरणाचे दरवाजे पूर्णपणे बंद करण्यात आले. त्यामुळे कराड तालुक्यासह पाटण आणि सांगली, कोल्हापूर जिल्ह्यातील नदीकाठच्या गावांना मोठा दिलासा मिळाला.

कोयना धरण पाणलोट क्षेत्रातील महाबळेश्वर, नवजा तसेच कोयना परिसरात विक्रमी पावसाची नोंद झाली. त्याचबरोबर संपूर्ण सातारा, सांगली आणि कोल्हापूर जिल्ह्यात अतिवृष्टी होऊन कृष्णा, कोयना तसेच अन्य प्रमुख नद्यांना महापूर आला. त्यामुळे सांगली व कोल्हापूर जिल्ह्यातील जनजीवन पूर्णपणे विस्कळीत झाले असून महापुरामुळे अतोनात हानी झाली आहे. कराड, पाटण तालुक्यातील नदीकाठच्या गावांना ही मोठा फटका बसला असून कोट्यवधीचे नुकसान झाले आहे.

गेल्या पाच ते सहा दिवसांपासून पावसाचा जोर ओसरला असला तरी कोयना धरणातून पाण्याचा विसर्ग सुरू होता. आज सकाळी धरणाचे दरवाजे तीन फुटावर स्थिर ठेवण्यात आले. मात्र, दुपारी धरणात येणाऱ्या पाण्याची आवक पूर्णपणे घटल्याने धरणाचे सहा वक्र दरवाजे बंद करण्याचा निर्णय कोयना धरण व्यवस्थापनाने घेतला.

३ ऑगस्टला दुपारी १ वाजता दोन फुटाने दरवाजे उघडून कोयना नदीपात्रात पाणी सोडण्यास सुरुवात करण्यात आली होती. त्यानंतर पावसाचा जोर वाढल्याने धरणाचे दरवाजे सोळा फुटांपर्यंत उचलून कोयना नदीपात्रात पाणी सोडण्यात आले होते. मात्र, आता धरणाचे सहा वक्र दरवाजे पूर्णपणे बंद करण्यात आले असून केवळ धरणाच्या पायथा वीजगृहातून वीज निर्मितीनंतर कोयना नदीत प्रतिसेकंद २ हजार १०० क्युसेक पाण्याचा विसर्ग सुरू ठेवण्यात आला आहे.

1 COMMENT

LEAVE A REPLY

Please enter your comment!
Please enter your name here