केंद्र सरकारचा शेतकऱ्यांना झटका ; चक्रवाढ व्याजमाफी योजनेतून कृषी कर्जे डावलली

3,076 views

वादळ आणि अतिवृष्टी अशा अस्मानी संकटांचा सामना करणाऱ्या शेतकऱ्यांच्या जखमेवर मीठ चोळण्याचा प्रकार केंद्र सरकारने केला आहे. करोना संकटात कर्जहप्ते स्थगित (Emi Moratorium) करून त्यावरील चक्रवाढ व्याज माफी जाहीर करणाऱ्या केंद्र सरकारने या योजनेतून शेतकऱ्यांना मात्र वगळले आहे. चक्रवाढ व्याजमाफीतून कृषी कर्जे वगळण्यात आल्याचे सरकारने स्पष्ट केले आहे. त्यामुळे शेतकऱ्यांना चक्रवाढ व्याजमाफीपासून वंचित रहावे लागणार असून त्या व्याजाचा अतिरिक्त भार सोसावा लागणार आहे.

करोना संकटात कर्जदारांना दिलासा देणाऱ्या केंद्र सरकारच्या चक्रवाढ व्याजमाफी योजनेच्या अंमलबजावणीचा मार्ग मोकळा झाला आहे. नुकताच रिझर्व्ह बँकेकडून अध्यादेश जारी करण्यात आला. कर्जदारांना दिलासा देणारी ही योजना येत्या ५ नोव्हेंबर रोजी लागू होणार आहे. बॅंकांना तसेच वित्त संस्थांना चक्रवाढ व्याजाची माफ केलेली रक्कम ५ नोव्हेंबरपासून कर्जदाराच्या बँक खात्यात जमा करावी लागणार आहे. त्यानंतर या रकमेची बँकांना १२ डिसेंबरपर्यंत सरकारकडे मागणी करता येईल.यामुळे केंद्राच्या तिजोरीवर ६५०० ते ७००० कोटींचा अतिरिक्त भर येण्याची शक्यता आहे. नुकताच अर्थ मंत्रालयाने या योजनेसंबधी वारंवार विचारल्या जाणाऱ्या प्रश्नांची उत्तरे (एफएक्यू) बुधवारी प्रसिद्ध केली. यामध्ये व्याजावरील व्याजमाफी देण्यासाठी २९ फेब्रुवारी ही तारीख ग्राह्य धरली जाणार असल्याचे स्पष्ट करण्यात आले आहे. मात्र यात पीक कर्ज आणि ट्रॅक्टरसाठी घेण्यात आलेल्या कृषी कर्जावर चक्रवाढ व्याजमाफी लागू होणार नाही, असे स्पष्ट करण्यात आले आहे.

सर्वसाधारणपणे दरवर्षी मॉन्सूनपूर्व मशागतीच्या कामासाठी शेतकरी अवजारे खरेदी, मशागत, यंत्र खरेदी, ट्रॅक्टर खरेदीसाठी कर्ज घेत असतो. शिवाय निर्सगाच्या लहरीपणामुळे होणारे नुकसान टाळण्यासाठी पीक विमा घेतो. काही वेळा पीक कर्ज घेऊन शेतकरी शेती कसत असतो. मात्र त्याने घेतलेल्या कर्जाकडे सरकारने सर्रास दुर्लक्ष केले आहे. करोना संकटात सर्वसामान्य कर्जदारांची काळजी घेत केंद्राने सहा महिने कर्जदारांची मासिक हप्त्यांतून सुटका केली होती. त्यात आता त्यावरील व्याजावर व्याज माफ करण्याचा निर्णय सरकारने घेतला. यामुळे दोन कोटींपर्यंत कर्ज असणाऱ्या जवळपास ७५ टक्के कर्जदारांची सुटका झाली आहे. परंतु या मोठ्या योजनेत बळीराजा मात्र कुंपणाबाहेर राहिला आहे. कृषीशी संबधित कर्जांना या योजनेचा लाभ मिळणार नसल्याने शेतकऱ्यांमध्ये सरकारविरोधात तीव्र नाराजी व्यक्त होत आहे.

व्याजमाफी योजना
१ ) आर्थिक व्यवहार विभागाकडून जारी करण्यात आलेल्या मार्गदर्शक तत्वांनुसार १ मार्च ते ३१ ऑगस्ट या काळात Emi Moratorium चा पर्याय निवडलेल्या कर्जखात्यांवरील चक्रवाढ व्याज माफ केले जाईल.

२) चक्रवाढ व्याज जे २९ फेब्रुवारी २०२० पर्यंतच्या कर्जखात्यांवर आकारले जाईल. ही योजना ५ नोव्हेंबरपासून लागू होईल.
३) लोन अग्रीमेंटनुसार व्याजाचा दर निश्चित होईल. २९ फेब्रुवारीनंतर व्याजदरात झालेला बदल ग्राह्य धरला जाणार नाही.

४) ईएमआय मोरॅटोरियमचा मार्च ते ऑगस्ट या कालावधीत व्याजाची रक्कम ५००० ते ६००० कोटींच्या आसपास असेल असा अंदाज आहे. काहींच्या मते हा आकडा १०००० कोटी ते १५००० कोटीच्या दरम्यान असण्याची शक्यता आहे.

५) सरकारने लघु आणि मध्यम उद्योजकांचे कर्ज, २ कोटींपर्यंत वैयक्तिक कर्ज, शैक्षणिक कर्ज, गृहकर्ज, वाहन कर्ज, कंझुमर ड्युरेबल्स लोन यासारख्या सर्वच कर्जांना चक्रवाढ व्याज माफ करण्याची भूमिका घेतली आहे.

LEAVE A REPLY

Please enter your comment!
Please enter your name here